O Mercado da estrela nace en Galicia para amosar o traballo dos novos creadores galegos! Artistas, artesáns e novos emprendedores de disciplinas como a ilustración, a moda, os complementos, os cosméticos ou a fotografía, ensinarán as súas coleccións para que poidas convertelas nos teus agasallos de Nadal!

Apostamos polo talento galego por iso, ademais das túas compras navideñas, noMercado da estrela poderás descubrir a bandas musicais emerxentes e a novos artistas galegos presentando os seus últimos traballos e  amenizando as xornadas coas súas propostas!

Este Nadal non deixes de lado a túa parte creativa! No Mercado da estrelahaberá tempo para que investigues nas túas capacidades artísticas. A través de distintos obradoiros lúdicos poderás achegarte a disciplinas como a cerámica ou a música clásica de forma amena e interactiva… Para que non te deites sen saber unha cousa máis! Non esquecemos tampouco aos  cativos, que terán tamén espazo e tempo para o entretemento a través de xogos e actividades.

O Mercado da estrela ten presente que estes son tempos difíciles para moitos colectivos especialmente necesitados, e reserva un importante espazo físico para a solidariedade. Nel, agrupacións de cooperación local que necesitan máis que nunca de recursos materiais e inmateriais para seguir axudando aos máis desfavorecidos, daránse a coñecer para recabar a túa empatía e participación.

A luz do Nadal volve co Mercado da estrela! Propoñemos unha busca persoal e en clave optimista destas tradicionais festas apostando por redescubrir o ánimo de intercambiar, agasallar e recuperar o espírito de comunidade. É por iso que contaremos  cun espazo para charlar, descansar e gozar do tempo compartido na zona de restauración. Alí disfrutarás de DJs e música en directo e atoparás unha ampla oferta gastronómica con apetecibles productos de alimentación e bebidas coa que recuperar forzas e coller pulo para continuar a xornada!

Agardámoste no Mercado da estrela! Ven e redescubre o teu Nadal!